HomeKahaniSuicide Point : Ek Prem Kahani | Romantic Hindi Love Story

Suicide Point : Ek Prem Kahani | Romantic Hindi Love Story

- Advertisement -

Romantic Hindi Love Story: Pahaadi wale mandir ka khoobsurat najara… rimjhim barsti fuhaar ke saath kaale badlon aur thandi hawaon ki jugalbandi…charon taraf bikhari hariyaali aur Pahaadi ki unchai se gahri khaai me girti chamchmaati nadi ka vihangam najaara … jaane kyu log is swarg se manohari sthaan ko ” suicide point ” kahte hain…

Aaditya aur Shivika yahin ki ek chattan par haathon me haath liye baithe hain… Shivika ne apne sir ko Aaditya ki chhati par tikaya hua hai aur Aaditya Shivika ko khud me samete huye hai …Dono khamosh baithe shunya me nihar rahe hain…thodi der yun hi chup rahne ke baad Aaditya ne khamoshi todi…

Suicide Point : Ek Prem Kahani

Suicide Point
Suicide Point

Aaditya– to phir kya socha hai ?

Shivika– ek adrak waali chai aur bread – makkhan… aur haan chai thodi strong banwaiyega kyuki subah jaldi uthne ki vajah se sir me thoda takleef hai…aur thand si bhi lag rahi hai…

Shivika ka jawaab sun Aaditya chaunk kar use dekhne laga par uske masoom chehre ki chanchalta aur aankhon ke khalipan ko dekh kuchh bhi bol nahi paya…aur chal diya chai ke tappre ki ore jo vahan se bas thodi si doori par sthit tha…

Shivika Aaditya ko jaate huye dekh rahi thi… use Aaditya ke chehre ki pareshani aur chinta ki lakeerein pal pal dard de rahi thi… par vivash thi vo…

Shivika ko Aaditya se pahli mulakat yaad aane lagi…Collage ke pahle din jab dari sahmi si vo apni class khoj rahi thi usi dauraan pahli baar mili thi Aaditya se…

- Advertisement -

uss samay chal rahi junior – senior ki luka chhipi me bholi Shivika ne Aaditya se hi apni class poonchh dali jo uska senior tha aur Aaditya ne bhi de diya class ka pata par galat …Shivika ne jab Aaditya ke bataye room me enter kiya to sabhi ne uska swagat taliyon se kiya…darasal me yah seniors ki class thi…

isse pahle ki Shivika ko kuchh samjh aata samne se ek ladki uth kar aayi aur usne bataya ki ve sabhi seniors hain …Shivika ki to sitti pitti gumm…

isse pahle ki vo ladki aage kuchh aur bolti Shivika ki aankhon se ganga jamuna bah nikli…hichkiyan lekar rone lagi Shivika…sabhi ko uski iss harkat par hasi bhi aa rahi thi aur darr bhi lag raha tha ki iska aise rona kahi kisi bade loche me na fasa de…

Aaditya bhi jaane kab aakar Shivika ke peechhe khada sara najaara dekh raha tha… Shivika ko rote dekh use na jane kyu bilkul achha nahi laga aur usne jaise hi Shivika ko chup karane ki koshish ki Shivika ne uski taraf behad masoomiyat se dekha…Aaditya kuchh der Shivika ko yun hi dekhta raha…

Aaditya ne jaise taise par kaise bhi karke apne doston ko mana liya aur Shivika ko vahan se bahar le aaya…par vo bahut darr gayi thi aur bhagti huyi seedhe gardan me jakar ruki…peechhe Aaditya bhi daudte huye aaya aur haamfte huye bola…

Aaditya– uff kitna tej daudti ho tum …thaka diya mujhe… racer ho kya ??

Shivika–Aapse matlab…

- Advertisement -

Aaditya– yaar tum ladkiyan aansu na tapkaya karo…kasam se jaan nikal jati hai…bas yahi haar jaate hain ham ladke…

Aaditya ne apni rumaal Shivika ki ore badhai to madam ne apni chhoti si pink rumaal se apne gaalon par dhunge motiyon ko saaf kiya aur boli…

Shivika– oo mr … jaan na pahchan… mai tera mehmaan… gale hi pade jaa rahe ho…pahle to mujhe seniors ke beech fasa diya phir khud hi bacha bhi liya…ab kya ahsaan jatane aaye ho ? ye sare hathkande maine filmo me bahut dekhe hain…mai nahi fasne waali…

Aaditya– madam ji meri galti nahi hai.… ye din sabhi ladkon ki jindgi me aata hai… mere bhi aa gaya…yun samjh lo ki ye to hona hi tha…vidhata ki lekhni you know…

Shivika– m…mai samjhi nahi…

Aaditya–yah samjhne ki nahi feel karne waali cheez hai madam ji vo bhi dil se…

Aaditya ka lahja thoda serious ho chuka tha…

- Advertisement -

Shivika– (apni kalaai ghadi par najar daalte huye ) mile huye matra 20 min huye hain aur apko feel bhi hone laga hai…gajjab…

Aaditya– pahle hi min me feel ho gaya tha.…

itna kah kar Aadiya ne ek gahri aur bharpoor najar dali Shivika par … aur phir apne seene par haath rakh kar aaah bharne ka ishara kiya…

Shivika awaak use ghoore jaa rahi thi…aur achanak muskurane lagi… use khud bhi nahi pata tha ki kyu muskuraayi vo…Par ye silsila jo chala to kabhi nahi ruka…do jism aur ek jaan, ek dooje ki pahchaan ho gaye dono…

Shivika doodh si ujjwal aur khoobsurat nain naksh ki maalkin thi…uski khoobsurti uski masoomiyat aur bhole pann se aur badh jati thi…Aaditya lamba chauda aur behad khushh mijaj ladka tha… uske dimaag ka to jawaab nahi.… sabhi loha mante the uski buddhi ka… aur inn dono ki jodi behad pyaari lagti thi… inko dekh barbas hi sabhi ke muhh se nikal jata tha ” made for each other “.

jahan bhi dikhte sath hi dikhte…kahi kisi ped ke neeche to kabhi chhat ki munder par kabootron ke jode ki tarah…kahi canteen ke kone ki chairs par to kabhi khali lab me… classes bhale alag the par thikaane same the… Pahli najar ka pyaar parwaan chadd chuka tha…sang jeene marne ki kasme khayi jaa chuki thi…

ek doosre ke baare me jab poonchha to pata chala ki pariwaar ke mukhiyaon ( Head of the family )me koi khaas banti nahi hai yaa yun kahein ki dushmni thi aur dono ki cast bhi alag thi… par pyaar karne waalon ko kab in sab baaton se fark pada hai jo in dono ko padta…par darr jarur baith gaya tha dil me…

aise hi annual day par jab sare student Raat ko bhi college me hi ruke the uss din to Aadi aur Shivi ki khushi ka thikana nahi…” Aa raat bhar jaayein naa ghar ” gungunaate dono garden me araam se ek duje ko nihaar rahe the… uss din jaane kya soojha Aadi ko … kheech liya Shivi ko khud par aur uske honthon ki mithaas ko chakhne laga … Shivi to thi hi Aadi ki diwaani … vo bhi Aadi ki godd me baithe huye uske geele labon ke shahad ko peeti rahi … dono ko parwaah nahi thi kisi ki… pyaar me besudh Shivi ko achanak hi jab apne seene par kapdon ke upar se hi Aadi ki garm saanse mahsoos huyi usi pal uski dhadkano ne ho halla kar diya seene me… Aadi unme sama jana chahta tha aur Shivi ke haath pair sabb kaampne lage the iss ahsaas se … par uss pal jab Aadi ke haath jab Shivi ke seene ko naapne lage Shivi ko jaise hosh aa gaya … phir kya tha Shivi vahan se bhagne lagi… Aadi ki hasi chhoot gayi… uske baad to ye chhed chhad roj ki inke pyaar ki khuraak ban gayi par isse jyada kabhi nahi badhe dono… apni seemaon me hi ek duje ko diwaangi ki hadd tak chahne lage… abb ek duje ke bin gujaara mushkil tha…

Samay kiske liye kab ruka hai… dekhte hi dekhte Shivika B.tech aur Aaditya M.tech ke last semester me pahunch gaye…bhavishya ke sunahre khwaab bunne lagi aankhein… par Aadi aur Shivi ke khwaabon me bhi sirf muhobbat thi … ek duje ka saath tha… khushiyon bhara jahaan tha…

Par wakt hamesha ek sa nahi rahta hai…jaane kaise Shivika ke gharwaalon ko iss muhobbat ki Bhanak lag gayi…phir kya tha shuru ho gaya muhobbaton me kayamat ka daur… Shivi ko mil chuki thi exam ke baad seedhe shadi ki chetawani jo maa ne di thi… aur papa ne to hadd hi kar di…najar rakhne ke liye banda set kar diya aur abhi se shaadi ke liye ladka bhi talaashne lage … abb to saari ajaadi chhin gayi yahan tak ki Shivi aur Aadi ka baat kar pana bhi muhaal ho gaya tha…

last paper ke din Shivika ko apni seat par ek chit mili jis par likha tha ” meet me at lab jaan — Aadi “… phir kya tha jaise taise Shivika ne pass hone layak paper solve kiya aur bhaagi lab apne Aadi se milne…

Shivika jab lab me pahunchi to Aaditya uska badi bechaini se intjaar kar raha tha…Shivi bina kisi ki parwaah kiye bas apne Aadi ki baahon me sama gayi aur ek chhoti bachi ki tarah subakne lagi…aaj dono ka collage me last din tha… Shivika bahut dukhi thi… Aadi ne bhi Shivi ko khud se alag na hone diya… vo bahut jyada bhawuk ho gaya tha…kuchh der aise hi rahne ke baad dono alag huye…

Shivi ne Aadi ki laal paneeli aankhein dekhi to tadap uthi…bade mushkil se bharraye gale se keval itna bol paayi …

Shivika–pareshan mat hoiye Aadi… sab theek ho jayega…

Aaditya– ghanta theek ho jayega… betu please meri hi rahna… mujhse door mat jana…marr jaunga tum bin…

Shivika– awww… mai aapse door nahi jaa rahi hoon Aadi…bas mere halaat theek nahi hain…aur aap meri jindgi ho… please ye marne waali baat dobaara mat boliyega… bahut dukh hota hai…

Aaditya– Sorry abb nahi bolunga Meri jindgi… meri Shivi…chal Shivi kahi door bhag chalein …

Shivika– kahan…

Aaditya–pahle chal to sahi baaki ka baad me sochenge…

Shivika– aur hamaari kayrta ka ghar walon par kya prabhaw padega…kya beetegi unn par…

Aaditya– to abhi kaun sa gold medal dene wale hain…abhi bhi bhashan , galiyan , laatein aur emotional atyachaar hi hona hai…

Shivika– Aadi apno ko dhokha dekar kuchh haasil nahi hoga… maa- baap se alag ham theek vaise ho jaiyene jaise ped se toota patta…nirjeev , bedam aur badrang…hamare bade hain vo… koi bhi idea sahi par mana lijiye naa unko… please Aadi…mere liye please… unke bin ham nahi rah paayenge …

Aaditya– aur ek doosre se bichhad kar ?? Kya ek doosre ke bina ham rah paayenge…

Aaditya ke sawaal ko sun kar hi Shivika sihar uthi…aur roti huyi vapas Aadi se lipat gayi…thodi der chup rahne ke baad Aadi bola…

Aaditya– chalo tumhare hi man ka karte hain… aaj ke baad tumko vaise bhi naa hi college aane milega aur naa hi mujhse baat kar paaogi … to aaj se theek ek Maheene baad subah 4 baje kaise bhi karke pahadi wali mata ke mandir aa jana… iss dauraan mai bhi apne gharwaalon ko raji karunga aur tum bhi karna…

Shivika– but betu agar vo raji na huye to…( Shivika rote huye boli)

Aaditya– to isme rone ki kya baat hai paagal… suicide point bhi to vahin hai naa ?? Bas tu suicide note chhod dena aur ye bhi likh dena ki tu suicide pahadi wali mandir ke suicide point par hi karegi…samjhi naa??

Shivika– theek hai Aadi… aisa hi karungi…

Abhi Shivika 30 din purane ateet ke panne palat hi rahi thi ki Aaditya chai lekar aa gaya…dono ne bade pyaar se chai pi aur ek doosre ko nashta karaya… thodi der ki khamoshi ke baad Aadi ne chuppi todte huye Shivi se poonchha ki usne ghar par baat ki kya ?? Shivi ka jawaab vahi tha jiska Aadi ko darr tha…

Shivika– kya baat kar rahe hain aap Aadi… poonchhne ki jarurat hi naa padi…ghar pahunchte hi maa ne mera collage bag chheen kar ek ore faink diya… meri activa ki chhabhi aur cell bhi chheen liye…aur mujhe itna jyaada danta aur bad duaain di ki mai koi paudha hoti to sookh hi jaati…aur mujhse boli ki…

Maa– kaashh tera gala maine paida hote hi ghont diya hota to ye din nahi dekhne padte… tune hamare pyaar ka najayaj fayeda uthaya hai… chhala hai hame… hamaari aankhon me dhool jhonk tu padhaayi ke bahaane gul chharre uda rahi thi… pata nai kabse muh kala kar rahi thi uss ha*** ke saath…hamne socha ki aaj ke jamaane ke sath chal rahi hai tu par tu to bhavishya ki sambhawnaayein talaash karte karte apne liye dulha hi talaash kar laayi…biradri me kisi ko pata pada to naak hi kat jaayegi…

Shivika– maa please samjhne ki koshish kariye… hamne kuchh bhi galat nahi kiya hai…please mamna meri help kar do last baar…mai unke bina ( iske aage kuchh bol hi na paayi Shivi… vatavaran me kayi dafa chattttaaaakkkkk ki awaaj goonj gayi aur sath hi Shivika ki siskiyon ki bhi )

Maa– tujhe laad (love) karke hi to ye din dekh rahe hain… achha hua wakt rahte pata padd gaya varna jaane kya din dekhne padd jaate…tujhe ye samjh kyu nahi aa raha ki ye koi film nahi hai ki bas pyar kiya aur pedo ke ird gird naach gaa liya aur happy ending… are moorkh ladki ye jindgi hai… asal jindgi… jahan pyaar muhobbat jaisi chhichhori harkatein ham bhale ghar ki aurton ko shobha nahi deti hain…

uske baad papa ne bhi yahi bola ki agar maine apna muhh band nahi kiya aur chupchap unke kahe anusaar shaadi nahi ki to vo mujhe jaan se maar denge…

Shivi ki baat sun Aadi ka chehra bilkul samanya tha kyu ki use issi sab ki ummeed thi…Aadi ne bhi bataya apni aap beeti pichhle Dinon ki…

Aaditya– Shivi maine jab maa ko bataya to vo thodi der to mujhe aise dekhti rahi jaise maine pyaar nahi kisi ka khoon kar diya ho… uspar jab maine tumhare papa ka naam bataya to vo apna sir pakad kar tab tak aise hi baithi rahi jab tak papa nahi aa gaye… aur papa ko jab saari baat pata chali to unhone mujhe bulaya aur poonchaa…

papa– maine suna ki tumne apni shadi fix kar li hai…

Aaditya–nahi papa pakki nahi ki hai… vo baat ye hai ki… vo… papa…

Papa–jo baat tum dhang se bol nahi paa rahe ho Aadi use karne ki himmat kahan se laaye … kya isi din ke liye mai loan lekar tumko padha raha hoon… kya ye sab karne se pahle tumne ek baar bhi mere aur apni maa ke bare me socha… yaa apni chhoti bahan ke baare me… Aadi aaj toot gaya mai beta… maine socha tha ki tum mera sahara banoge par …

Aadi apni baat kah kar Shivi ka chehra dekhne laga jis par saikdon bhaaw ek sath aa jaa rahe the…

achanak se Shivi foot foot kar rone lagi… bilkul paglon jaise apne ko thappad marne lagi aur saath saath bole bhi jaa rahi thi ki abb kya hoga…Shivi ki tadap Aadi ki aankhon ko bhi bhigo gayi…Aadi ne uske sir par haath ferte huye kaha…

Aaditya–ro mat meri jindgi… sabb theek ho jayega…abb ham juda na honge betu…

Shivika–abb kab theek hoga Aadi… aaj to sab khatm ho jayega naa…bolo naa Aadi kya abb hamare sapne kabhi poore nahi honge …kya abb hamaari nanhi si duniya kabhi nahi basegi…kya aaj ham haar jayenge Aadi…kya iss Suicide point par aaj ek aur jode ki bhent chadh jayegi…

Aaditya– nahi meri pari… yakeen rakho apne aap par …tumhare masoom dil me itni muhobbat hai ki patthar bhi pighal jaaye phir ye log to hamaare maa baap hain…hamaara bura kabhi bhi nahi hone denge…

Kul mila kar dono ke ghar wale kisi bhi keemat par manne ko taiyaar nahi the… kyu ki Shivi aur Aadi ki cast to alag thi hi dono pariwaar ke mukhiya yani head of the family me 36 ka aankda tha jiska harjaana ab inn dono ki masoom muhobbat ka khoon se bhara jana tha…Shivika Aadi ke agle kadam se anjaan thi par anhoni ke darr se vo Aadi ke seene me khud ko chhipa kar baithi huyi thi…

Shivi aur Aadi ki isi tarah baithe Teen ghante ho gaye the… subah ke saat baj chuke the… mandir me ghor sannata chhaya hua tha jo ki hamesha hi rahata tha… kewal nawratri me mela lagta tha varna aam taur par sannata hi rahta tha…tej hawa aur ghane kale baadlon se risti paani ki boondo ne mahaul ko khaufnaak bana diya tha…unjaala bhi naam matra ka hi ho paya tha…

Achank vatawaran me gaadiyon ki tyron ke charmaraahat ki awaaje goonjne lagi… Shivi darr se tharr tharr kampne lagi…uska chera safed pad gaya tha …par Aadi ka chehra samanya tha… vo Shivi ko pakde vahin chattan ke peechhe chhipa raha…thodi – thodi der ke antraal par dono ki family ke log aa chuke the…Aaditya ki maa aur Shivi ki dadi ro ro kar besudh si ho chuki thi…aisi koi aankh nahi thi jo chhalak naa rahi ho…

Sare log inn dono ki body ko talashne ki garaj se aage badhe hi the ki Shivi aur Aadi ki apni ore aata dekh sabhi stabdh rah gaye…sabhi ke peele pade chere ek baar phir se khil uthe…tabhi Shivi ke papa ki dahaad goonji…

Shivika ke papa– ye kya tamasha hai Shivi…tumhara dimaag to theek hai naa…ye kya naatak laga rakha hai tumne… ( apne pita ki dahad se dar kar Shivi ne Aadi ko aur bhi jor se pakad liya tha ) dekho jara iss ladki ki besharmi… na hi koi sharm bachi hai na lihaj… isse to behtar tha ki tu paida hote hi marr jati…

Shivi ke pita ne apni bhadaas nikal di…tab Aadi ke pita bole…

Aadi ke pita– Aadi ye kya karne chale the tum… ek baar bhi ham logon ka khayal nahi aaya tumko…tumhare letter ne kitna dara diya tha pata bhi hai tumko…chalo ghar beta…

Aaditya ke papa ka gala rundha gaya tha…

Aaditya– mai ghar nahi chalunga papa…

Aaditya ke pita– par kyu ??

Aaditya– papa hamare suicide ki khabar ne jo dard aapko aaj ek ghante me diya hai naa vahi dard hame bhi ho raha hai jab aap log mujhe meri Shivi se alag kar rahe hain…Papa , uncle mujhe pata hai iss wakt aap logon ko hamaari ye harkat bachkani aur behuda lag rahi hogi par jara sochiye kya ham chahte to bhaag nahi sakte the ? Kya aur koi kadam nahi utha sakte the… Par naa hi bhage naa hi koi galat kaam kiya kyu ki hamne koi galat kaam nahi kiya hai aur na hi hamara irada aap logon ki beizzati karwane ka hai…

papa, uncle ham dono ne apni padhayi poori kar li hai aur apna bhala bura sochne ki takat bhi rakhte hain…Agar ham aap logon ko takleef nahi dena chahte aur lihaj kar rahe hain to aap log kyu sirf aur sirf hamare bure ke liye soch rahe hain…kyu hame alag karna chahte hain… aakhir kasoor kya hai hamaara…

Aadi ke bolne ke baad dari sahmi si shivi me bhi jaane kahan se himmat aa gayi usne bhi haath jodkar rote huye apne papa se kaha…

Shivika–papa please hame alag mat kariye … ham ek doosre ke bina marr jayenge… aapki marji ke bina ham na bhagenge na shadi karenge par aapki marji se bhi ham kisi aur se shadi nahi karenge…papa maine Aadi ko pasand karke samaaj me aap ki ijjat kharab kar di par jab aapne Bhaade ke gundon ko mere Aadi ko marne peetne ke liye paise diye tab aapki ijjat me kya sitare jadd gaye…papa galat to tab hota na jab mai Aadi ke saath bhaag jati ya marr jati… par papa aap logo par yakeen hai hame… aap log hamara bharosa ho…

Aab sab kuchh aap logo ke haath me hai… agar hamara milna aapko manjoor nahi hai to hame judai ki jagah maut manjoor hai kyu ki judai me roj marne se achha hai aap sab ke samne hi mar jaayein… abb sab aap logon ke hath me hai……Aadi aur Shivi haath jod kar khade the…

sabhi log aankhe faade niruttar se khade unn dono ko dekh rahe …Aadi aur Shivi ke haath jude huye the aur aankhon me aansu ke saath hi ek gahra vishwaas bhi tha ki ” aaj ke baad dono kabhi juda nahi honge… “

Tabhi baadlon ke jheene aanchal ki ote se suraj ki kuchh maheen kirne inke chehre par padi jo inke chamak ko badha rahi thi… aaj Suicide point kisi ko niglne ki jagah kisi ke milan ki gawaahi de raha tha…

- Advertisement -
- Advertisement -

ये भी पढ़े

- Advertisement -

संबंधित पोस्ट

- Advertisement -

कोई जवाब दें

Please enter your comment!
Please enter your name here

13 − twelve =